“Azərsun Holdinq”in şirkəti 2,5 milyon manat zərər açıqladı

“Ölkə.Az”ın məlumatına görə, sözügedən dövrə sığorta şirkətinin cəmi aktivləri 42,520 mln manat olub ki, bu da hesabat ilinin əvvəli ilə müqayisədə 2 dəfə artım deməkdir. Şirkətin aktivlərində təkrarsığortanın payı ciddi şəkildə artıb və il ərzində 20 mln manat artaraq 21,585 mln manata çatıb.

“Azərbaycan Sənaye Sığorta”nın cəmi öhdəlikləri 4 dəfə artaraq ötən ilin sonunda 33,988 mln. manat olub. 

Nizamnamə kapitalı 11 mln manat olan sığorta şirkətinin bölüşdürülməmiş zərəri 2,468 mln manat olub. Nəticədə, şirkətin cəmi kapitalı 8,532 mln manat olub ki, bu da illik müqayisədə 34% azdır.

Ötən ilin yekununda “Azərbaycan Sənaye Sığorta” ASC-nin cəmi gəlirləri 10,051 mln manat, cəmi xərcləri 12,527 mln manat təşkil edib. Nəticədə, şirkət ötən ili 2,476 mln manat xalis zərərlə başa vurub.

Qeyd edək ki, “Azərbaycan Sənaye Sığorta” “Azərsun Holdinq”ə daxildir və ASC-nin səhmlərinin 95%-i “Anadolu İnvestment Company” MMC-yə, 5%-i isə “Azərbaycan Sənaye Bankı” ASC-yə məxsusdur. 

Könül
Ölkə.Az