“Nikosayağı”nın düşdüyü qəzada günahkar kimdir? - AÇIQLAMA

“Ölkə.Az” xəbər verir ki, hadisə nəticəsində xəsarət alan Nicat Şakirli sağ yuxarı ətrafın dirsəkdən amputasiyası diaqnozu ilə, Rüstəmov Fəxri sağ əlin kəsilmiş yarası diaqnozu ilə tibb müəssisələrinə təxliyə olunublar.Qəza nəticəsində 1 həkimə qədər ölüm qeydə alınıb.

Hadisədən sonra sosial medianın diqqəti isə qəzanın səbəblərinə yönəlib. Bəziləri sürücünü günahlandırıb, bəziləri isə qəzanı yol infrastrukturunun hazırkı vəziyyəti ilə əlaqələndirib.

Nəqliyyat sahəsi üzrə ekspert, “İnsan yönümlü şəhərlər” səhifəsinin rəhbəri Anar Əliyevin fikrincə, bu prospekt avtomobil idarə edənləri sürəti artırmağa sövq edir: 

Şəhər daxilindəki küçələr yüksək sürətlə sürməyə şərait yaratmamalıdır 

“Bakı şəhərində küçə və prospektlərin dizaynına yenidən baxılmalıdır. Şəhər daxilində səni yüksək sürətlə sürməyə sövq edən küçələr olmamalıdır”.

“Heydər Əliyev prospekti hər tərəfdən yaşayış zonaları ilə əhatə olunub, amma yol özü magistral kimi təşkil edilib”, - deyə ekspert əlavə edib.

A.Əliyev təhlükəsiz prospekt nümunəsi kimi Norveçin paytaxtı Oslo şəhərini göstərib. Bu isə Heydər Əliyev prospektinin keçmiş görüntüsü ilə oxşarlıq təşkil edir.

Nəqliyyat sahəsi üzrə bir digər ekspert Eldəniz Cəfərli isə bu yolda sürət həddinin yüksək olmasını normal hesab edir: “Heydər Əliyev prospektinin kiçik bir hissəsi şəhəriçi yol sayıla bilər. Böyük bir hissəsi isə şəhər kənarındadır və magistral yoldur. Magistral yol da sürətli ola bilir.  Vaxtilə prospektin şəhəriçi hissəsində sürət həddi 90 km/saat olsa da, daha sonra 70 km/saata endirildi. Şəhərkənarı magistral hissəsində isə sürət həddi 110-dan 90-a endirildi”.

İşıqlandırmanın zəif olması, qəzaların səbəblərindən biridir

Ekspertin sözlərinə görə, Bakının əsas yollarından biri olan Heydər Əliyev prospektində də işıqlandırma olduqca zəifdir: “Bu da qəzaların səbəblərindən biridir. Lakin qəzaların çoxu, əsasən, yol hərəkəti iştirakçılarının bilərəkdən yol hərəkəti qaydalarını pozması nəticəsində baş verir. İkinci səbəb kimi isə yol infrastrukturunun vəziyyətini göstərmək olar. Üçüncü səbəb isə avtomobillərin nasaz olması ilə bağlıdır”. 

Sürücülük qabiliyyəti çox aşağıdır

“Ümumiyyətlə, Azərbaycanda nəqliyyat vasitəsi istifadəçilərinin sürücülük qabiliyyəti çox aşağıdır. Yol hərəkəti qaydalarını sürücülərin bir hissəsi demək olar ki bilmir, müasir avtomobilləri idarə etməyi bacarmır”. 

Cərimə sistemi ilə qəzaların sayını azaltmaq olmaz

E. Cəfərli deyir ki, bilərəkdən qayda pozuntusu Azərbaycanda geniş yayılıb, bunun da bir neçə səbəbi var: “Bu gün Azərbaycanda tənbeh növü kimi, əsasən, cərimə götürülür və maarifləndirmə geri planda qalır. Yəni siz yüz dəfə də qaydanı pozsanız, cəriməni ödəyərək avtomobilinizi sürməkdə davam edəcəksiniz. Həm pulu olan, həm də olmayan düşünür ki, qaydanı pozsa belə, sadəcə, cərimə ödəyəcək. Halbuki yol-patrul xidməti əməkdaşları sürücünü saxlayan kimi dərhal onun cərimə edilməsi haqqında deyil, maarifləndirilməsi istiqamətində iş apara bilər. Bu zaman biz qəzaların sayının azlmasına nail ola bilərik. Bugunkü cərimə sistemi ilə heç bir halda qəzaların sayının azalmasına nail ola bilməyəcəyik”. 

“Heydər Əliyev prospekti, Ziya Bünyadov küçəsi paytaxt Bakının əsas qəza ocaqları olan yollarıdır. Bu yolların qəza ocaqları kimi qeydiyyatı aparılmalı, xüsusi xəbərdaedici nişanlar quraşdırılmalıdır”, - deyə ekspert əlavə edib.

Könül
Ölkə.Az