Turistik bölgələrimizdə nəqliyyat problemi: boyun uzundursa, minmə! – RƏSMİ AÇIQLAMA
Ölkə.Az xəbər verir ki, Şəki şəhərində sözügedən yöndə əsas narahatlıq avtobusların köhnə və çox yığcam olması ilə bağlıdır.
Müxtəlif marşrut üzrə fəaliyyət göstərən, həm də kəndlərə işləyən bu mikroavtobuslar arasında vəziyyəti yaxşı olanlar yer alsa da, köhnələrinə də rast gəlinir.
Turizm mövsümündə yerli və xarici turistlərin üz tutduğu Şəkidə təəssüf ki, normal ölçüdə avtobus gözə az dəyir. Tutumu az olan bu nəqliyyat vasitələrinin hündürlüyü də qənaətbəxş deyil. Cəmi 12-15 nəfərlik oturacaq yeri olan bu avtobuslarda ayaq üstə getmək müşkül məsələdir. Boyu 1.65-dən yuxarı olanlar oturmağa yer yoxdursa, gərək ictimai nəqliyyatdan istifadə etməsin. Şəhərlərarası qısa məsafədə bu o qədər problem yaratmasa da, uzaq kəndlərə sərnişin daşıyan avtobuslarda uzun yol getmək işgəncəyə çevrilir. Paytaxtda və rayonlarda ictimai nəqaliyyatda gediş haqqının eyni olduğunu nəzərə alsaq, gərək xidmətdə keyfiyyət də Bakıdakı kimi olsun.
Burada sıxlıq paytaxtdakı kimi olmasa da, böyük avtobuslarda rahat şəkildə getmək hər bir sərnişinin haqqıdır.
Mövzu ilə bağlı Yerüstü Nəqliyyat Agentliyinin mətbuat katib Tural Orucov Ölkə.Az-ın sorğusuna cavab olaraq bildirib ki, qurumun avtobus bazası yoxdur və nəqliyyat vasitələri daşıyıcılara məxsusdur. O, dəyişikliklərin mərhələli şəkildə aparıldığını söyləyib:
“İctimai nəqliyyatda sərnişinlərə göstərilən xidmətlərin təhlükəsizlik və keyfiyyət baxımından yüksək standartlara çatdırılması məqsədilə avtobus parkının yenilənməsi daim diqqət mərkəzindədir.
Avtobuslar sahibkarlara məxsusdur. Sərnişindaşıma sahəsində göstərilən xidmətin keyfiyyəti, təhlükəsizliyi və rahatlığının artırılması, həmçinin marşrutların təhkim edilməsində şəffaflığın təmin edilməsi məqsədilə şəhərlərarası və şəhərdaxili marşrut xətləri müvafiq qanunvericiliyin tələblərinə uyğun olaraq, mərhələli qaydada müsabiqəyə təqdim edilir. Müsabiqənin şərtlərindən biri də avtobusların daha yeni olmasıdır”.
Billurə Yunus
