Azərbaycan dilini bilməmək ayıbdır, dilə hörmətsizlikdir - Nazir

Ölkə.Az xəbər verir ki, bu sözləri elm və təhsil naziri Emin Əmrullayev Bakı şəhəri təhsil işçilərinin sentyabr konfransında çıxışı zamanı deyib.

“Çünki Azərbaycan dövlət ümumtəhsil müəssisəsini bitirən gəncin Azərbaycan dilini başa düşməməsi və yaxud da səlis danışmaması, düşünürəm ki, sistem üçün həqiqətən də ayıbdır. Bunun başqa adı yoxdur. Belə olmamalıdır. Ən sadə nümunə olaraq küçədə Azərbaycan dilində danışan insanlar var. Orta məktəbi bitirən biri Azərbaycan dilində danışmırsa, bu, laqeydlikdən və ya dilə hörmətsizlikdən irəli gələ bilər. Başqa cür necə insan 17 yaşına çatar və bu dili danışmaya bilər? Mən həqiqətən bunu özümə izah edə bilmirəm. Bunda məktəbin də rolu böyükdür. Çünki məktəb həmin uşağa 11 il ərzində dövlət dili fənnindən qiymət yazaraq bir sinifdən o biri sinfə keçirir. Düşünürəm ki, bu alətdən istifadə etmək lazımdır. Azərbaycan dilinin Azərbaycan vətəndaşları tərəfindən mənimsənilməsini prioritet elan etmək o qədər də normal səslənmir, amma bunu biz hazırda problem kimi tanıyırıqsa, deməli, həll etmək istiqamətində də addımlar atmalıyıq”, - deyə nazir əlavə edib.

Billurə Yunus