Günəş şüaları hansı halda dəri xərçənginə SƏBƏB olur? - DETALLAR
Mütəxəssislər dərimizi hər fəsildə bu şüalardan qorumaq üçün günəş kremindən, spreylərdən və losyonlardan istifadə etməyi məsləhət edirlər.
Dermatoloq Kənan Əhmədov mövzu ilə bağlı Bizim.Media-ya danışıb. O, insanlara xüsusilə, maydan başlayaraq sentyabrın axırına qədər dərilərini günəş şüalarından qorumalarını məsləhət bilir:
“Günəş şüalarının ən çox zərərli olduğu vaxt məhz saat 11-dən 5-ə qədərki vaxtdır. Əgər bu saatlarda günəşin altında olacağınızı bilirsinizsə, SPF-lərdən istifadə etmək mütləqdir. Bəzən günəş şüaları insanlarda kontakt allergik dermatit xəstəliyinə yol aça bilər. Günəşin zərərli təsirləriylə bədənin açıq qalan hissələrində- üzdə, qollarda, boyunda, sinədə dəri xəstəlikləri inkişaf edə bilər”.
SPF seçərkən nələrə diqqət edək?
“SPF-lər həm günəş şüalarını buraxmaq dərəcəsinə, həm də dəri tiplərinə - həssas, akneli, yağlı, quru, quruluğa meyilli dərilərə görə fərqlənir. Suya davamlı olan və gözlə təmas edərkən yandırmayan SPF seçmək daha məqsədə uyğundur. Hər bir insan SPF-i öz dərisinə uyğun seçməlidir”.
Bəzən SPF-in təmizlənməsi üçün hidrofil yağından istifadə etməyin mütləq olduğu bildirilsə də, ekspert bunun vacib olmadığı qənaətindədir.
