Psixiatr xəbərdarlıq edir: "Artıq çəki beyinin fəaliyyətini zəiflədir"
Ölkə.az Oxu.az-a istinadən xəbər verir ki, bu barədə psixiatr Mixail Drobijev gazeta.ru-ya müsahibəsində bildirib.
"Kökəlmək qan təzyiqinin yüksəlməsi və insult riskinin artması ilə nəticələnir. Həmçinin, karbohidratla bol olan yeməklər qandakı şəkərin miqdarını qaldırır. Yüksək qlükoza isə insan beynində diqqət, yaddaş və mühakimə kimi koqnitiv funksiyaları tənzimləyən oreksin neyronlarının fəaliyyətini dayandırır. Nəticədə zehni aktivlik düşür və gümrah qalmaq çətinləşir. Qidalandıqdan sonra beyin dərin yuxu rejiminə keçir", - deyə mütəxəssis qeyd edib.
Bol karbohidratlı və yağlı yeməklərin qəbulu zamanı beyində xoşbəxtlik hormonu sayılan dopamin sərbəstləşir. Çox sayda insan bu cür qida dopaminindən asılı vəziyyətə düşür. Piylənmədən əziyyət çəkənlərin reaksiyaları alkoqolizm vərdişləri olan şəxslərin davranışları ilə oxşar olur.
Həddindən artıq çəkisi olan insanlarda bir sıra əlamətlər görünür: qidalanmaya qarşı qarşısıalınmaz istək, yemək prosesinə nəzarətin itirilməsi, porsiyaları kiçiltmək üçün edilən uğursuz cəhdlər, toxluq hissi üçün tələb olunan qida həcminin davamlı artması və yemək düşkünlüyü - insan sırf qidalanmaq naminə digər məşğuliyyət və zövqlərdən uzaqlaşır.
Drobijev məsələni belə izah edib: "Qida" kəlməsini "spirtli içki" kəlməsilə əvəzləməyə çalışın. O zaman aydın olacaq ki, piylənmədən əziyyət çəkən birini çox yeməkdən çəkindirmək, alkoqol aludəçisini içkidən uzaqlaşdırmaq qədər mürəkkəb prosesdir. Ən müsbət nəticələr intizamlı müalicə metodları ilə əldə edilir. Bu zaman pasiyentlə sadəcə endokrinoloqlar deyil, psixoloq, narkoloq və psixiatrlar da paralel məşğul olmalıdır. Beyini sevindirəcək yeni mənbələr tapılmalı, karbohidrat və yağ istehlakı azaldılmalı, rasiona bol zülallı məhsullar əlavə edilməlidir. Həmin zülallı yeməkləri öyrəşdiyimiz şirniyyat və ya yağlı qidalar kimi də təqdim etmək mümkündür", - deyə psixiatr fikrini tamamlayıb.
