Trampdan gözlənilməz gediş: İranla əməkdaşlıq və Hörmüzdə birgə müəssisə planı
Tramp qeyd edib ki, İranda baş vermiş "məhsuldar rejim dəyişikliyi"ndən sonra uranın zənginləşdirilməsinə son qoyulacaq. O, B-2 bombardmançıları tərəfindən dərində basdırılmış nüvə materiallarının ("tozunun") ABŞ və İran tərəfindən birgə qazılıb çıxarılacağını vəz edib. Hazırda həmin ərazilərin Kosmik Qüvvələrin peykləri vasitəsilə izlənildiyini deyən Prezident, sanksiyaların ləğvi üzrə 15 bəndlik planın böyük hissəsinin artıq razılaşdırıldığını vurğulayıb.
Hörmüz boğazında ABŞ-İran tərəfdaşlığı?
Digər mühüm təklif isə dünyanın ən mühüm enerji dəhlizi olan Hörmüz boğazı ilə bağlıdır. Tramp boğazın təhlükəsizliyini təmin etmək və gəmilərdən alınan keçid rüsumlarını idarə etmək üçün İranla "birgə müəssisə" (joint venture) yaratmaq ideyasını irəli sürüb.
"Bu, boğazı bir çox başqalarından qorumaq üsuludur", — deyə Tramp jurnalist Conatan Karlın sualını cavablandırarkən bildirib.
Diplomatik yaxınlaşma siqnallarına baxmayaraq, Tramp hərbi təhdidləri də diqqətdən yayındırmayıb. O, İrana silah tədarük etməyə davam edən ölkələrə qarşı 50% məbləğində gömrük rüsumu tətbiq ediləcəyini bəyan edib. Hazırda iki həftəlik atəşkəs rejimində olan tərəflərin bu radikal təkliflərə necə reaksiya verəcəyi dünya birliyinin diqqət mərkəzindədir.
