Hamilə qadınlara hansı halda uşaq əmizdirmək olmaz?

Körpəsi nə süd verən ana hamilə olduğunu bildikdən sonra “artıq sənin südün uşağı zəhərləyir" sözlərini eşitdiyi üçün süd verməkdə tərəddüd edir. Bu, yanlışdır.

Bu sözləri Ölkə.Az-a pediatr Aytən İsmayılzadə deyib. O, hamiləlik zamanı süddə hansı dəyişikliklərin baş verməsindən söz açıb.

“Bədəndə olan hormonal dəyişikliyə görə, südün qatılığı, miqdarı, dadı dəyişə bilər. Dadı daha duzlu ola, miqdarı isə hamiləlik artdıqca azala bilər. Ancaq tərkibində faydalı maddələr azalmır və körpə sağlığına təsir edəcək bir şey olmur. Əgər hamiləliyin ilk aylarında düşük təhlükəsi varsa, əkiz və ya riskli hamiləlikdirsə, qanama halı olursa, süd vermə dayandırılır. Çünki əmizdirmə zamanı oksitosin hormonu çıxır ki, bu da uşaqlığın yığılmasına səbəb olur. Digər hallarda isə xüsusi göstəriş yoxdur”. 

Pediatr hamiləlik zamanı əmizdirmək zəhərli olmasa da, bəzi məqamlara diqqət yetirməyi tövsiyə edib:

“Süd vermə əlavə 500 kkal almaq deməkdir. Hamiləliyin ilk üç ayı əlavə 300 kkal almaq deməkdir. Buna əməl ediləcəkmi? Yoxsa elə hamilə birtəhər gününü hava, su ilə yola verərək həm bətnində, həm də yanında körpə bəsləməyə qərar verəcək. Nəzərə alsaq ki, hamiləlik zamanı, qusma, toksikoz baş verir,bunlar da südün azalmasına gətirir. Həm də südəmər körpə olması da o deməkdir ki, bu hamiləliklər arasında fasilə azdır. Belə olanda orqanizm özünü tam bərpa etməmiş yeni canlı bəsləməyə başlayır. Nəticədə ikinci körpə az çəkili doğulur, ya inkişaf zəif olur, ya raxit tez yaranır, ya da antenatal raxit ilə doğulur və s. Buna görə ən yaxşısı doğuşları planlamaqdır. İkinci məsələ isə bilməlisiz ki, südünüzü dərhal kəsməyə bir səbəb yoxdur (sağlam hamiləlik isə), üçüncüsü, onsuz da böyük olan əksər halda bir yaşdan böyük olur və əgər yaxşı qidalanmayıb ona da süd versəniz ikincini zəiflədərsiniz. Ona görə qərar verin. Ancaq bir yaş altı körpəniz var və yaxşı qidalanırsızsa, riskli hamiləliyiniz yoxdursa, bu zaman əmizdirməyə lazım olduğu kimi davam etmək lazımdır”.

Billurə Yunus