Uşaqlar qızılca xəstəliyindən bu səbəbdən ölür - Valideynlərə XƏBƏRDARLIQ
Son zamanda qızılca xəstəliyinin sürətlə yayılması cəmiyyətdə böyük narahatlıq yaradır.
Bu xəstəliyin yayılmasından çox, uşaqlar arasında ölüm hallarının artması da narahatlığı daha da artırır. Həkimlər isə valideynlərə bu sahədə diqqətli olmağı tövsiyə edirlər.
Tanınmış pediatr, uzman doktor Azər Əhmədov açıqlamasında bildirdi ki, rəsmi statistika göstərilməsə belə, ölkədə qızılca xəstəliyində artımlar müşahidə olunur.
Onun sözlərinə görə, bu artımın olmasında əsas amil valideynlərin və poliklinikalarda vətəndaşları düzgün yönləndirməmələri səbəbindən peyvəndlənmənin olmamasıdır:
“Bu sahədə peyvəndlərin 97 faizə qədər qoruyuculuğu var. Peyvəndlər vurulmadığı üçün qızılca xəstəliyi yayılıb. Buna görə pandemiyanın yaranması ehtimalı yoxdur. Pandemiya infeksion xəstəliyin bütün bir qitəni götürdüyü zaman yaranır.
Düşünmürəm ki, qızılca xəstəliyi pandemiya olsun. Çünki digər ölkələrdə bununla bağlı peyvəndlənmə sahəsində vəziyyət o qədər də ağır deyil. Bu əsasən bizim kimi postsovet ölkələrində problemlidir. Digər Avropa ölkələrində isə risk demək olar ki, yoxdur. Amma epidemiya ola bilər”.
Həkim deyir ki, əsasən 5 yaşına qədər olan uşaqlarda qorxuludur:
“Azyaşlılar ağırlaşmalar ola bilər. Ciddi şəkildə ağırlaşmalar zamanı pnevmoniya, orta qulağın iltihabı ola bilər. Ən gec ağırlaşması isə ensefalitdir.
Bu zaman təəssüf ki, insanın heç bir müalicəsi yoxdur. Pnevmoniya, orta qulağın iltihabı olan uşağı qurtarmaq mümkündür. Lakin ensefalit olan uşağın həyatda qalması mümkün olmur”.
Azər Əhmədov uşaqların qorunması yollarını da belə izah edib:
“Bu bir virus infeksiyasıdır. Sadəcə yayılma ehtimalı yüksəkdir. Hava-damcı yolu ilə yayılır. Lakin doğru şəkildə və təbii məhsullarla qidalanma zamanı uşaqlarda müqavimət bir az daha güclü olur. Bu zaman uşaq xəstəliyi bir az yaxşı keçirə bilər.
Qızılca xəstəliyinin spesifik müalicəsi yoxdur. Bir çox virus infeksiyalarında olduğu kimi xüsusi müalicə üsulu yoxdur. Çoxlu maye qəbul etməlidir.
Əsasən xəstəliyin ağırlaşmasını müalicə edirik. Qızılca xəstəliyinin özündən yox, ağırlaşmasından ölüm halları baş verir. Ona görə də, ağırlaşmanın qarşısını almaq lazımdır.
Belə bir əlamətlər olduğu zaman mütləq həkimə müraciət etmək laızmdır. İlk öncə qrip əlamətləri ilə başlayır. Sonradan dəri səpkilərin olması, yüksək hərarətin olması müşahidə olunur. Əsasən yuxarıdan, boyun ətrafından aşağıya doğru səpkilər yaranır.
Valideynlərə bir nömrəli məsləhətimiz budur ki, övladlarına təkcə qızılca xəstəliyinə qarşı deyil, digər xəstəliklərə də qarşı peyvəndlər vurdursunlar. Peyvənd həyat qurtarır. İnfeksion xəstəliklərin hamısı ilə mübarizə optimal yolu peyvəndləmədir”.BAKU.WS
