Bel ağrısını dəqiqələr içində azaldan təbii yollar

Ölkə.az xəbər verir ki, dəqiqələr içində həmin üsullar sayəsində ağrıdan əsər-əlamət qalmır.

Bel (və ya kürək) ağrısı müxtəlif səbəblərlə ortaya çıxa bilər. Bel ağrısı çox zaman onurğada baş verən problemlərlə əlaqəli olur. Ancaq bəzən də gün ərzində yanlış hərəkətlər, ağır yüklərin qaldırılması və ya düzgün yatmamaq nəticəsində meydana gəlir. Bu cür hallarda təbii yollarla ağrını yüngülləşdirmək mümkündür.

Əgər belinizdə qəfil ağrı yaranıbsa və bu ağrıdan tez bir zamanda xilas olmaq istəyirsinizsə, aşağıdakı təbii üsullar sizə kömək edə bilər:

Lavanda yağı ilə masaj

Lavanda yağı sakitləşdirici və əzələ boşaldıcı təsirə malikdir. Zeytun yağı ilə qarışdıraraq belinizə masaj formasında tətbiq etdikdə, ağrını yüngülləşdirməyə kömək edir.

Zəncəfil və zərdəçal çayı

Hər iki bitki güclü iltihab əleyhinə xüsusiyyətə malikdir. Bu iki möcüzəvi məhsuldan kürək nahiyəsində iltihabın yaratdığı ağrıları aradan qaldırmaq üçün bitki çayı hazırlaya bilərsiniz. Zəncəfil və zərdəçalla dəmlənən çaydan gündə 1-2 fincan içmək ağrıları azaltmağa kömək edə bilər.

Nanə tərkibli məlhəmlər

Nanə yağı və ya acı bibərdən əldə olunan kapsaisin maddəsi ilə hazırlanan məlhəmlər sinirləri sakitləşdirərək ağrını azaldır. Nanənin soyuq və rahatlaşdırıcı təsiri də ağrını yüngülləşdirməyə kömək edir.

İsti-soyuq kompres

Bel ağrıları ilk dəfə yarandıqda, 48 saat ərzində soyuq və isti kompres tətbiq etmək ağrıları azaltmağa kömək edir. Sonrakı mərhələdə isə isti kompres (məsələn, isti dəsmal) əzələləri rahatladır, qan dövranını sürətləndirir və ağrını azaldır.

Bu üsullar bel ağrısından təbii və təhlükəsiz şəkildə xilas olmaq istəyənlər üçün faydalı ola bilər. Ağrılar uzun müddət keçməzsə və ya güclənərsə, mütləq həkimə müraciət edilməlidir.

Həmidə İbrahimova