Avrasiyanın yeni oyun qurucusu: Bakının bu rolundan narahat olanlar kimlərdir?

“Dünyanın geosiyasi xəritəsi sürətlə dəyişir. Ukrayna müharibəsi, Yaxın Şərqdə davam edən qarşıdurmalar, qlobal enerji təhlükəsizliyi ətrafında yaşanan gərginliklər və böyük güclər arasında artan rəqabət beynəlxalq münasibətlər sistemini yeni mərhələyə daşıyır. Belə mürəkkəb şəraitdə bir çox dövlətlər böhranların təsiri altında zəiflədiyi halda, Azərbaycan özünü sabitlik, etibarlılıq və əməkdaşlıq məkanı kimi təsdiqləməyi bacarır.

Məhz buna görə də son dövrlər Azərbaycanın əldə etdiyi uğurların fonunda ölkəmizə qarşı informasiya hücumlarının intensivləşməsi təsadüfi deyil. Azərbaycanın beynəlxalq nüfuzunun artması, regional və qlobal proseslərdə söz sahibinə çevrilməsi müəyyən dairələri ciddi şəkildə narahat edir”.

Bunu Ölkə.az-a açıqlamasında Milli Məclisin deputatı Cavanşir Feyziyev deyib.

ABŞ-Azərbaycan münasibətlərində yeni mərhələ

Onun sözlərinə görə, son dövrlərdə Vaşinqtondan Bakıya verilən mesajlar göstərir ki, ABŞ-Azərbaycan münasibətləri yeni strateji mərhələyə daxil olur. “ABŞ Prezidenti Donald Trampın Prezident İlham Əliyevə ünvanladığı məktub da bu baxımdan xüsusi əhəmiyyət daşıyır”, - o vurğulayıb.

 Deputat əlavə edib ki, bu məktub təkcə diplomatik etiket xarakteri daşımır: “Məktubun siyasi mahiyyəti ondan ibarətdir ki, Vaşinqton Azərbaycanın regional və qlobal proseslərdə oynadığı rolu daha aydın şəkildə görür və qiymətləndirir.

ABŞ anlayır ki, Cənubi Qafqazda sabitlik, enerji təhlükəsizliyi, nəqliyyat-kommunikasiya dəhlizlərinin inkişafı və regionda uzunmüddətli sülhün təmin olunması məsələlərində Azərbaycanın iştirakı olmadan ciddi nəticə əldə etmək mümkün deyil.

Bu mənada Trampın məktubu həm Bakıya verilən siyasi dəstək mesajı, həm də Azərbaycanın beynəlxalq sistemdə artan çəkisinin etirafı kimi qiymətləndirilə bilər.

Məktubun geosiyasi şifrəsi

Əslində məktubun əsas mesajı daha dərindir.
Vaşinqton son illərdə Prezident İlham Əliyevin həyata keçirdiyi çoxvektorlu və balanslaşdırılmış xarici siyasətin nəticələrini görür. Azərbaycan nə Qərblə münasibətlərini qurban verir, nə də Şərqlə əməkdaşlıq imkanlarını məhdudlaşdırır.

Bu siyasət nəticəsində Azərbaycan həm Avropa üçün enerji tərəfdaşı, həm Türk dünyasının aparıcı ölkələrindən biri, həm də Şərqlə Qərb arasında etibarlı əlaqələndirici mərkəzə çevrilib.
Məhz buna görə də Azərbaycan bu gün regionda deyil, daha geniş Avrasiya məkanında geosiyasi balansın mühüm elementlərindən biri kimi qəbul olunur”.

Bakının Qərblə Şərq arasında körpü missiyası

Deputat bildirib ki, müasir beynəlxalq münasibətlər sistemində etibarlı tərəfdaş olmaq hərbi gücdən heç də az əhəmiyyət daşımır:

“Azərbaycan son illərdə sübut edib ki, o, yalnız enerji ixrac edən ölkə deyil. Azərbaycan eyni zamanda sivilizasiyaları, iqtisadiyyatları və siyasi mərkəzləri birləşdirən strateji platformadır.
Orta Dəhlizin inkişafı, enerji marşrutlarının şaxələndirilməsi, yaşıl enerji layihələri, Türk Dövlətləri Təşkilatı çərçivəsində inteqrasiyanın gücləndirilməsi və Avropa ilə Asiya arasında logistika əlaqələrinin genişləndirilməsi Bakının qlobal əhəmiyyətini artırır.

Bu gün dünyanın bir çox siyasi mərkəzlərində Azərbaycan sabitliyin, etibarlılığın və praqmatik əməkdaşlığın simvolu kimi qəbul edilir.

Azərbaycanın “yumşaq güc” və orta güc” kimi rolu artır

Əgər bir zamanlar Azərbaycan əsasən enerji resursları ilə tanınırdısa, bu gün ölkənin beynəlxalq nüfuzu onun yumşaq güc potensialı ilə də ölçülür.

WUF13 forumunun uğurla keçirilməsi, beynəlxalq humanitar təşəbbüslər, COP29-un irsi, Bakı Enerji Həftəsi kimi qlobal platformalar Azərbaycanın yalnız iqtisadi deyil, siyasi və humanitar mərkəzə çevrildiyini nümayiş etdirir.

Bu tədbirlər vasitəsilə Azərbaycan beynəlxalq ictimaiyyətə mühüm mesaj verir: Bakı qlobal problemlərin müzakirə olunduğu, həll yollarının axtarıldığı və dialoqun təşviq edildiyi platformadır.

Məhz buna görə də ABŞ və digər böyük güclər Azərbaycanı yalnız regional aktor kimi deyil, beynəlxalq münasibətlər sistemində məsuliyyətli və etibarlı tərəfdaş kimi qəbul etməyə başlayıblar.

İnformasiya hücumlarının arxasındakı səbəb

Azərbaycanın artan nüfuzu fonunda bəzi dairələrin ölkəmizə qarşı informasiya kampaniyalarını gücləndirməsi də məhz bu reallıqla bağlıdır.

CNN-də yayılan və anonim mənbələrə əsaslanan iddialar ətrafında yaranan müzakirələr göstərir ki, müəyyən qüvvələr Azərbaycanın beynəlxalq mövqeyinə kölgə salmağa çalışırlar.
Lakin bu cür kampaniyalar yeni deyil. Azərbaycanın böyük beynəlxalq tədbirlərə ev sahibliyi etdiyi, mühüm diplomatik uğurlar qazandığı və ya geosiyasi əhəmiyyətinin artdığı dövrlərdə oxşar informasiya hücumlarının şahidi olmuşuq.

Bu cür cəhdlərin əsas məqsədi Azərbaycanın beynəlxalq nüfuzuna zərbə vurmaq, ölkəmizin vasitəçilik imkanlarını zəiflətmək və regionda formalaşan yeni əməkdaşlıq modelinə mane olmaqdır.

Yeni reallıq dəyişmir

Lakin geosiyasi reallıqlar göstərir ki, Azərbaycanın rolu getdikcə artır.

Bu gün Bakı həm enerji təhlükəsizliyi, həm nəqliyyat dəhlizləri, həm regional sabitlik, həm də beynəlxalq əməkdaşlıq baxımından mühüm əhəmiyyət daşıyır.

Prezident İlham Əliyevin rəhbərliyi altında həyata keçirilən siyasət nəticəsində Azərbaycan böhranları riskdən daha çox fürsətə çevirməyi bacaran dövlət modelini ortaya qoyub.
Məhz buna görə də ölkəmiz haqqında formalaşdırılmağa çalışılan mənfi narrativlər strateji reallığı dəyişdirə bilmir. Əksinə, dünya siyasətinin aparıcı aktorları Azərbaycanın artan rolunu qəbul edir, Bakı ilə əməkdaşlığı genişləndirir və ölkəmizi Avrasiyanın mühüm güc mərkəzlərindən biri kimi qiymətləndirirlər.

Bütün bunlar göstərir ki, ABŞ-Azərbaycan strateji tərəfdaşlığının yeni mərhələsi təkcə iki ölkə üçün deyil, bütövlükdə Cənubi Qafqaz, Xəzər hövzəsi və Avrasiya məkanı üçün yeni imkanlar vəd edir. Azərbaycanın yüksələn beynəlxalq nüfuzu isə artıq müvəqqəti tendensiya deyil, formalaşmaqda olan yeni geosiyasi reallığın tərkib hissəsidir”.

 Mürtəza Bünyadlı