Qərbin yeni "diz çökdürmə" planı: Rusiyaya qarşı yeni taktika işə salındı
Qərb ötən 44 gün ərzində Rusiyanın Ukraynada nəbzini yoxlayıb, hərb gücünü diqqətlə təhlil etdikdən sonra yeni taktika seçib.
Qərb artıq hesab edir ki, Rusiya Ukraynanı işğal etməkdə qarşısına qoyduğu məqsədləri tamamilə iflasa və strateji uğursuzluğa düçar olub.
ABŞ Dövlət katibi Entoni Blinken Rusiyanın Ukryanadakı hərbi əməlliyyatlarını dəyərləndirərkən deyib: "Rusiyanın üç məqsədi var idi: Ukraynanı öz iradəsinə tabe etmək və onu müstəqillik yolundan döndərmək; Rusiyanın gücünü təsdiqləmək; Qərbi və Alyansı parçalamaq. Və bu, hər üç cəbhədə uğursuzluğa düçar oldu".
Ukrayna müharibəsi Rusiya ordusunun qüdrəti uydurulan məğlubedilməzlik mifini darmadağın etdi. Bu müharibə göstərdi ki, Rusiya ordusu və hərbi texnikası deyildiyi kimi deyil, müasir müharibə aparmaq qabliyyətində deyil. Məhz buna görə də Rusiya Ukraynada qarşısına qoyduğu məqsədlərə nail ola bilmədi.
Rusiyanın uğrusuzluğunun digər səbəbi isə tətbiq edilən sanksiyaların qısa zamanda ölkə iqtisadiyyatına ciddi mənfi təsirinin olmasıdır. Artıq Rusiya iqtisadiyyatı ciddi şəkildə axsamağa başlayıb. Moskva anladı ki, belə şəraitdə Ukryanada aypara taktikasına uyğun olaraq genişmiqyaslı hərbi əməliyyatları davam etdirmək mümkün olmayacaq və bu taktika daha ciddi itkilərə gətirib çıxaracaq. Ona görə də məcburiyyət qarşısında qalaraq bu taktikadan imtina edərək geri çəkilib, Ukraynanın cənub-şərq istiqamətinə Donbas və Krım istiqamətinə toplamağa qərara gəlib. Bu istiqamətdə hərbi əməliyyatları davam etdirmək istəyir.
Amerikalı diplomat Viktoriya Nuland da mətbuata verdiyi açıqlamada Rusiya silahlarının özünün doğrultmadığını və çox zəif silahlar olduğunu söyləyib.
Əgər Qərb bir müddət Rusiyadan ehtiyatlanırdısa, indi isə zəifləməsindən və gücdən düşməsindən istifadə edərək daha inamlı formada ciddi hərbi və iqtisadi təzyiq taktikasını seçib. Qərb daha ağır sanksiyalar və tədricən hərbi cəhətdən iştirakını artırmaqla Rusiyanı tamamilə çökdürmək istəyir.
Avropa İttifaqının (Aİ) xarici əlaqələr və təhlükəsizlik siyasəti üzrə ali nümayəndəsi Jozef Borrel Avropa Parlamentində çıxışı dediklərmizin sübutudur. Borrel deyib ki, Ukraynada müharibə bitməsini istəyiriksə, o zaman Ukrayna silahlandırılmalıdır. Hansı ki bir müddət öncə Aİ diplomatiyasının rəhbəri ehtiyatlı mövqe sərgiləyirdi.
Borrel həmçinin Aİ-nin Rusiyadan neft və qaz almaqdan imtina etməyin vaxtının çatdığını bəyan edib. O deyib ki, Aİ Ukraynaya etdiyi yardımdan qat-qat çox Rusiyaya pul qazandırır.
“Biz Ukraynaya 1 milyard avro verdik... Amma bir milyard avro, bizə verdiyi enerjiyə görə hər gün Putinə ödədiyimiz puldur”, - Borrell deyib
Avropa İttifaqı Şurasının rəhbəri Şarl Mişel Avropanın neft və qaz idxalına qadağa qoymağa məcbur olacaq.
Aİ artıq Rusiya kömürünün idxalına qadağa qoyub.
Aİ-nin növbəti sanksiya paketi əsasən enerji sektorunu nəzərdə tutduğundan Rusiya iqtisadiyyatına daha sarsıdıcı zərbə vuracaq. Bu da öz növbəsində Rusiyanın Ukraynada hərbi əməliyyatlarını davam etdirməsinə ciddi əngəl yaradacaq.
NATO-nun baş katibi Yens Stoltenberq isə Alyans üzvlərini Ukraynanı artıq daha çox ağır silahlarla və başqa formalardan istifadə etməklə yardım etməyə çağırıb. Bu isə birbaşa hərbçilərin Ukraynadakı hərbi əməliyyatlarda iştirakını nəzərdə tutur. Yəni NATO Ukraynada birbaşa formada deyil dolayı formada canlı qüvvə ilə iştirak etməyi planlaşdırır. Məhz bu yolla Qərb Rusiyanı çökdürüb, geri otuzdurmaq istəyir.
Lakin lazımi məqamda NATO-nun Ukryandakı hərbi əməliyyatlarda birbaşa iştirakı istisna edilmir.
Düzdür, Stoltenberq NATO-nun Rusiya ilə daha geniş müharibəyə cəlb edilməməsini bəyan etsə də, verdiyi açıqlama Alyansın hərbi müdaxilədə dolayı iştirakını birmənalı şəkildə nəzərdə tutur: “NATO qoşun göndərmir. Bizim də borcumuz var ki, bu münaqişə Ukraynadan kənara çıxmasın və daha da ölümcül, daha təhlükəli və dağıdıcı xarakter almasın”.
Amma bu, qarşıdakı mərhələdə proseslərin gedişindən, Rusiyanın üzləşdiyi vəziyyətdən və özünün necə aparmasından asılı olacaq.
Mürtəza Bünyadlı
Ölkə.Az
