Kökəlməsinin arxasında nə yatır? - Yerinə varisinin keçməsini tələb edirlər
“ABŞ Prezidenti Donald Tramp fiziki və psixoloji vəziyyətinə görə özünə nəzarəti itirir, bu səbəbdən də o, təcili olaraq hakimiyyətdən uzaqlaşdırılmalıdır”.
Ölkə.az xəbər verir ki, bu barədə ABŞ-nin nüfuzlu “The Hill” qəzeti geniş analitik məqalə dərc edib.
Yazıda qeyd olunur ki, bir müddət əvvəl amerikalı senatorlar Şeldon Uaythaus və Cek Rid 36 tanınmış həkimin rəsmi bəyanatını Konqresin protokoluna daxil ediblər. Həmin bəyanatda həkimlər Prezident Trampın səhhətinin sürətlə pisləşdiyi, reallıqdan qopduğu və getdikcə daha təhlükəli xarakter aldığı barədə xəbərdarlıq ediblər.
Məqalə müəllifləri vurğulayırlar ki, ABŞ tarixinin ən yaşlı seçilmiş prezidentinin fiziki və əqli cəhətdən bu ali vəzifəyə uyğun olmadığını göstərən əlamətlər getdikcə artmaqdadır:
“2025-ci ilin aprelində keçirilən ilk tibbi müayinədən sonra Ağ Evin həkimi hesabatı 48 saat ərzində ictimaiyyətə təqdim etmişdi. Lakin onun 2026-cı ilin mayındakı son müayinəsinə gəlincə, Ağ Ev əvvəlcə günlərlə səssiz qaldı. Sonradan isə həkim Şon Barbabellanı rəsmi arayışı yayımlandı. Sənəddə Trampın “əla sağlamlıq vəziyyətində” olduğu iddia edilsə də, onun son bir ildə 14 funt (təxminən 6.3 kq) çəki qazandığı qeyd olunub, təcili arıqlamaq və idmanla məşğul olmaq tövsiyə edilib”.
“The Hill” qəzeti rəsmi hesabatların pərdəarxası məqamlarına toxunaraq, Trampın səhhəti ilə bağlı mətbuatdan gizlədilən faktları sadalayıb:
“Onun qollarında yaranan “izah edilə bilməyən göyərmələr”, venoz çatışmazlığı diaqnozu, çıxışları zamanı müntəzəm olaraq dil səyrimələri, faktları qarışdırması və rəsmi tədbirlərdə qəfil yuxuya getməsi xüsusi vurğulanıb. Məhz bu səbəbdən tənqidçilər artıq onu mediada “Yuxulu Don” (Sleepy Don) adlandırmağa başlayıblar”.
Qeyd edək ki, yaranmış vəziyyətlə bağlı jurnalistlər və siyasi analitiklər ABŞ Konstitusiyasına edilmiş 25-ci düzəlişin işə salınmasının vacibliyini dilə gətirirlər. Sözügedən hüquqi düzəliş dövlət başçısı fəaliyyət qabiliyyətini itirdiyi təqdirdə prezident hakimiyyətinin vitse-prezidentə və digər varislərə keçməsi qaydasını tənzimləyir.(qafqazinfo)
