Gələn il büdcə pulları hara xərclənəcək? - ŞƏRH
"Ölkə.Az" xəbər verir ki, bunu iqtisadçı ekspert Eldəniz Əmirov deyib. O bildirib ki, 2024-cü ilin xərclər üzrə siyasətində 4 priorotet istiqaməti ölkənin sosial-iqtisadi həyatı, ölkənin hərbi və milli təhlükəsizliyi, Naxçıvanın inteqrasiyası (inkişafı) və işğaldan azad edilmiş ərazilərimiz üzrə fəaliyyət olacaq:
"Əsas məsələyə gəldikdə isə, yəni 2024-cü ildə dövlət büdcəsinin həm gəlirinin, həm də xərcinin azalması proqnoz edilir. Belə ki, gəlirin 33 milyard 765 milyon manat olması proqnozlaşdırılır ki, bu da 2023-cü ilin dürüstləşdirilmiş göstəricisi ilə müqayisədə 125,5 milyon manat və yaxud 0,4% azdır. Xərclər də 2023-cü ilin dürüstləşdirilmiş proqnozu ilə müqayisədə 269,8 milyon manat və ya 0,7% azalaraq 36 milyard 355 milyon manat proqnozlaşdırılır.
Xərc gəlirdən daha çox azaldıldığı üçün gələn il büdcə kəsirinin də 2023-cü ilin dürüstləşdirilmiş proqnozu ilə müqayisədə 144,3 milyon manat və ya 5,3% azalaraq 2 milyard 590 milyon manat olması gözlənilir".
Ekspertin sözlərinə görə, gələn il neftin satış qiyməti 60 dollar götürüləcəkdir ki, nəticədə daxil olan pulun 49,6%-i (16 milyard 756 milyon manat) neft sektorunun, 50,4%-i (17 milyard 9 milyon manat) qeyri-neftqaz sektorunun payına düşəcək. Halbuki, bu il neft sektorundan daxil olan pul 52,3% olmaqla, qeyri-neftqaz sektorundan daxil olan 47,7%-lik payı üstələyirdi.
"Neft fondundan gələn il büdcəyə tranfert həcmi 12 milyard 781 milyon manat planlanır ki, bu da az məbləğ deyil, 2024-cü ildə neft sektoru üzrə dövlət büdcəsinin gəlirlərinin 76,3%-ni təşkil edəcək. 2024-cü ildə qeyri-neft/qaz sektoru üzrə büdcə gəlirlərinin 58,1%-i vergi, 34,7%-i gömrük orqanlarının xətti ilə daxil olacaq".
“Pullar hara xərclənəcək” sualına cavab olaraq E. Əmirov deyib ki, ən çox pulun iqtisadi fəaliyyət üzrə, ən az pulun isə mənzil və kommunal təsərrüfatı üzrə xərclənməsi nəzərdə tutulur: "Belə ki, birinciyə 7 milyard 380 milyon manat, ikinciyə isə 364 milyon manat xərclənməsi proqnoz edilir. Daha sonrakı ikinci yeri 6,42 milyard manatla müdafiə və milli təhlükəsizlik, üçüncü yeri 4,81 manatla ümumi dövlət xidmətləri, dördüncü və beşinci yerləri isə uyğun olaraq 45,49 milyarda manatla təhsil, 45,42 milyard manatla sosial müdafiə və sosial təminat tutur.
Xususilə qeyd etmək istərdim ki, ilin sonunda büdcənin Milli Məclisdə qəbulu zamanı və eləcə də, 2024-cü ilin ortalarında büdcəyə yenidən baxılması zamanı bu ilkin proqnozların hələ bir neçə dəfə dəyişməsi mümkündür. Hətta baxmayaraq hazırkı proqnozla büdcə gəlir və xərclərində artımlar qeyd edilmir, böyük ehtimal ki, yay düzəlişlərindən sonra 2024-cü ilin sonuna həm gəlir, həm xərc hissə bu illə müqayisədə artımla icra ediləcəkdir".
Könül
Ölkə.Az
