40 minə yaxın ailə Qarabağa köçürüləcək - AÇIQLAMA
"Ölkə.Az" xəbər verir ki, bunu iqtisadçı deputat Vüqar Bayramov deyib. O bildirib ki, revanşist meyillər ilə Ermənistan regionda dayanıqlı sülhün formalaşmasına imkan vermir: "Amma Azərbaycan ordusu istənilən təxribata cavab vermək gücündədir. Təbii ki, regionun inkişafı üçün ən məqbul yol qarşıdurma deyil, məhz qarşılıqlı olaraq ərazi bütövlüyü və suverenliyin tanınmasına xidmət edəcək sülh müqaviləsini imzlamaqla yeni səhifəni açmaqdır".
Millət vəkilinin sözlərinə görə, Ermənistanın təxribatlarına rəğmən Qarabağ və Şərqi Zəngəzurda bərpa işləri davam edir: "Ötən il işğaldan azad olunan ərazilərimizdə yenidənqurma işlərinə 4 milyard 315 milyon manat ayrılıb. Bütövlükdə, son 2 ildə bu istiqamətə 6,5 milyard manat yönəldilib. 2022-2026-ci illərdə isə işğaldan azad olunan ərazilərimizin bərpa və yenidən qurmasına 19,2 milyard manatın ayrılması nəzərdə tutulub".
"Qarabağda ərazilərin 15%-i minalardan təmizlənib. Artıq bu ilin sonunda Böyük Qayıdışın yeni mərhələsi başlanılacaq. 2026-cı ilədək isə 40 minə yaxın ailə, bütövlükdə 150 mindən çox vətəndaşımız 30 ildən sonra öz ata-baba yurdlarına qayıdacaqlar", - deyə V. Bayramov əlavə edib.
Könül
Ölkə.Az
