Mətn ölçüsü:
  • 100%

“Rus qoşunlarının uzun müddət Qazaxıstanda qalması ciddi narazılıqlara gətirib çıxaracaq”

“Qazaxıstanda baş verən hadisələr daha çox böyük geosiyasi hadisələr öncəsi bir xüsusi əməliyyat təsiri bağşlayır. Ona görə də baş verənlər də aydınlıqlardan daha çox müəmmalar mövcuddur. Bunu baş verən hadisələr sübut edir. Çünki burada baş verən olaylar digər ölkələrdə baş verənlərlə heç oxşarlığı yoxdur, tamamilə fərqlidir”.

Bunu “Ölkə.Az”a açıqlamasında deputat Sahib Alıyev deyib.

Onun sözlərinə görə, digər ölkələrdə baş verən hadisələrdə on minlərlə adam küçələrə axışırdı, amma Qazaxıstandakı hadisələrdə haradasa on minədək adam küçəyə çıxdı.

“Burada etirazçıların sayı elə də çox deyildi. Digər tərəfdən hakimiyyət qısa zamanda da etirazçıların tələbini nəinki yerinə yetirdi, hətta hakimiyyəti istefaya göndərdi. Bu yetməmiş kimi ardınca daha ciddi müəmmalar baş verməyə başladı. Aksiyalar daha da alovlandı və ölkəni digər şəhərlərinə keçdi. Aksiya iştirakçıları asanlıqla dövlət inzibati binalarını ələ keçirməyə başladı. Hətta Alamtıda Təhlükəsizlik Komitəsinin binası, hava limanı asanlıqla ələ keçirildi. Sanki kimsə deyirdi ki, gəlin binanı ələ keçirin. Odur ki hadisələr xüsusi əməliyyat təsiri bağışlayır. Bu isə onu deməyə əsas verir ki, bu xaosun arxasında konkret hədəf olub. Bu, kimlər tərəfindənsə idarə olunub. Başqa mühüm bir məsələ isə ondan ibarətdir ki, Qazaxıstan dövlətini yaradıb, onu bölgənin ən güclü dövlətinə çevirən Nursultan Nazarbayev haradadır. Niyə səsi gəlmir? Bax ona görə də proseslərlə bağlı çoxsaylı suallar və müəmmalar mövcuddur.
Lakin təəssüf hissi ilə qeyd etmək istərdim ki, Qazaxıstanda baş verənlər nə Qazaxıstan dövlətçiliyinin, nə də qazax xalqının maraqlarına xidmət etməyən hadisələrdir. Bu hadisələr yaxın perspektivdə Qazaxıstanda gərginlikdən başqa yaxşı heç nə vəd etmir” - o qeyd edib.

Proseslərdə Rusiyanın roluna gəldikdə deputat bildirib ki, bu, artıq danılmaz faktdır: “Artıq Rusiya bu ölkəyə qoşun yeridib. Baş verənlər yaxın perspektivdə Rusiya üçün uduşlu hesab oluna bilər, lakin orta perspektivdə proseslər Rusiyanın əleyhinə çevrilmə ehtimalı daha böyükdür. Bu da sonuc etibarilə Qazaxıstan üçün də çox təhlükəli nəticələrə gətirib çıxara bilər. Əgər bu oyunların arxasında Rusiyanın Qazaxıstanı yürütdüyü balanslı siyasətdən sapındırıb, geri çəkməkdirsə, o zaman ölkəni yaxşı heç nə gözləmir. Çünki bu ölkəyə 400 mlrd dollar həcmində xarici investisiya yatırılıb və bunun böyük qismi Qərbin investisiyasıdır. O baxımdan da balanslı siyasətdən geri çəkilmək çox təhlükəli məsələdir”.

"Baş verənləri yeni SSRİ-nin bərpası prosesi kimi dəyərləndirənlər də var" fikrinə gəldikdə isə deputat bununla razılaşmayıb. O bununla bağlı RF prezidenti Putinin dediyi məşhur sözlərini xatırladıb: “SSRİ-nin dağılmasına təəssüflənməyinin ürəyi yoxdursa, onun bərpasına inanaların beyni yoxdur”. 

“Ümumiyyətlə, SSRİ-nin bərpası mümkün deyil. Rusiya istəsə belə, bunu edə bilməz. Çünki bunun üçün Rusiyanın yetərincə potensialı mövcud deyil, həm də istəmir. Lakin Rusiyanın keçmiş SSRİ məkanında olan ölkələri öz təsir dairəsində saxlamaq  iddiası var və bu niyyətini son vaxtlarda daha qabarıq formada ortaya qoyur”- deputat qeyd edib.

KTMT-nin Qazaxıstana girməsi və uzun müddət qala bilməsi ilə bağlı məsələyə gəldikdə deputat deyib ki, KTMT-nin uzun müddət Qazaxıstanda qalması mümkün deyil və bu ciddi narazılıqlara gətirib çıxaracaq: “Çünki qazax xalqı mübariz xalqdır və onun hasısa güc metodları ilə idarə emtək mümkün deyil. Rus qoşunlarının və KTMT qoşunlarının orada uzun qalması nə Rusiyanın, nə də Qazaxıstan hakimiyyətinin maraqlarına uyğun deyil. Biz bu ölkədə hadisələrin tez bir zamanda normal məcraya dönməsini arzu edirik”.

Mürtəza
Ölkə.Az