Mətn ölçüsü:
  • 100%

NATO-nun strateji planı ortaya çıxdı: Rusiyaya hücum olacaq, Putin devriləcək, hərbi-siyasi elita həbs ediləcək

Kremlə yaxın siyasi dairələr NATO-nun yeni planı üzrə Azov dənizi, Krım, Donetsk və Luqansk istiqamətlərindən eyni vaxtda hücum olunacağını ehtimal edirlər... Əgər, Rusiya ordusu darmadağın edilərsə, Kremlə yarımkapitulyasiya şərtləri diktə olunacaq, hərbi əməliyyatlar Rusiya daxilinə keçiriləcək, əhali arasında kütləvi narazılıq yaradılacaq, hakimiyyət dəyişikliyinə cəhd göstəriləcək...

"Ölkə.az" musavat.com-a istinadla bildirir ki, Ukrayna savaşı yeni dünya düzənini formalaşdıracaq əsas faktora çevrilib. Bu savaş dünyada mövcud olan əsas hərbi-siyasi güc mərkəzləri arasında qüvvələr nisbətini müəyyən edəcək. Və ona görə də, bu amansız savaşda Ukrayna beynəlxalq poliqon rolunu oynayır.

ABŞ və Qərbin əsas strateji planları Rusiyanı məğlub etmək hədəfi üzərində qurulub. Halbuki Qərbdə Rusiyanın məğlubiyyət modelləri ətrafında da müəyyən mövqe ziddiyyətlərinin olduğu qətiyyən diqqətdən yayınmır. Və bu, əsasən Qərbdə yeni dünya düzəni ilə bağlı maraqların kəskin şəkildə toqquşmasından qaynaqlanır.

Maraqlıdır ki, ABŞ başda olmaqla, Qərbdə bəzi ölkələr Rusiyanın sürətlə məğlub edilməsinə müsbət yanaşmırlar. Əksinə, bu qütbün təmsilçiləri hesab edirlər ki, Rusiyanın sürətli məğlubiyyəti Kremlin sonradan güc toplayaraq, revanş planları qurmasına imkan yarada bilər. Ona görə də, Rusiya uzunmüddətli savaşa məhkum edilərək, tədricən zəiflədilməlidir və yenidən güclənmək şansı qazanmamalıdır. Yəni, Rusiyanın öz hərbi-iqtisadi potensialını, resurslarını tamamilə tükətməsinə yönəlik strateji planlar qurulur.

2c2875f4-f235-40ec-8e6e-a865a74540ec.jpg (119 KB)

"The Economist"in yazdığına görə, Almaniya kanseri Olaf Şolts və yaxın ətrafı Ukraynanın təhlükəsizliyinə yönəlik addımların tədricən atılmasının tərəfdarıdır. Bu taktika bir tərəfdən Rusiyanı məğlubiyyətə aparan "savaş bataqlığı"nın daha dərin qatlarına çəkə bilər. Digər tərəfdən isə Rusiyaya qarşı beynəlxalq koalisiyanı daha geniş qarşıdurmadan, hətta nüvə savaşı təhlükəsindən də yayındırar. Hələlik belə yanaşma kifayət qədər uğurlu nəticələr verməkdədir.

Halbuki, bu taktikanın hansısa mərhələdə iflasa uğrama ehtimalı da olmamış deyil. Belə ki, Kremldə əsəblərin maksimum səviyyədə gətirdiyi artıq qətiyyən şübhə doğurmur. Hətta Rusiya Təhlükəsizlik Şurası sədrinin müavini Dmitri Medvedev yenidən Kremlin beynəlxalq rəqiblərini nüvə müharibəsi ilə hədələməyə başlayıb. O, vurğulayıb ki, nüvə silahına sahib olan Rusiyanın adi savaşda məğlub edilməsi olduqca təhlükəlidir. Çünki bunun ardınca məhz nüvə savaşı başlaya bilər.

Avropa Birliyinin xarici siyasət və təhlükəsizlik üzrə ali təmsilçisi Jozef Borrel isə D.Medvedevin nüvə şantajına hələlik əhəmiyyət verməyə həvəsli deyil. Onun fikrincə, Avropa Birliyi ölkələri Rusiya enerji resurslarından asılılıq səviyyəsini ciddi şəkildə məhdudlaşdırıblar. Bu ilin sonlarına doğru isə belə bir asılılıq ümumiyyətlə, qalmayacaq. Rusiya enerji resurslarının Avropa bazarlarına çıxışı tamamilə bloklanmış olacaq.

Belə anlaşılır ki, Rusiya üçün böyük çöküş ssenarisi hazırlanır. Qərb bütün planlarını məhz Rusiyanın bütün resurslarından məhrum edilməsi üzərində qurmağa çalışır. Qərb kəşfiyyatı Rusiyanın məğlubiyyətindən tamamilə əmindir. Hesab olunur ki, Rusiyanın yeni genişmiqyaslı hücum əməliyyatları üçün yetərli potensialı və resursları yoxdur. Hərbi təlimlərdən uzaq qalmış və silah-sursat təchizatı ilə bağlı ciddi problemlər yaşayan Rusiya ordusunun qalib gəlmək şansları isə ümidverici görünmür.

0ae88fc6e60467b733e0046040aa3b19.jpg (100 KB)

Təbii ki, rəsmi Kiyev də ABŞ və Qərbin Ukrayna savaşı üzərindən qurmağa çalışdığı strateji planların əsas hədəflərini anlamamış deyil. Düzdür, bu planlar ümumi şəkildə Ukraynanın maraqlarına cavab verir. Ancaq rəsmi Kiyevin məmnun olmadığı və hətta ciddi şəkildə narazı qaldığı məqamlar da olmamış deyil. Xüsusilə də, ABŞ və Qərbin Rusiyanı zəiflətmək üçün Ukrayna savaşını mümkün qədər uzatmağa çalışması rəsmi Kiyevi olduqca narahat edir. Çünki hərbi siyasi proseslərin belə davam etməsi, Qərbin silah-sursat təchizatını məqsədli şəkildə gecikdirməsi Ukraynada bütün sahələr üzrə dərin dağıntılara yol açır. Ukraynanın gələcək taleyini böyük təhlükə altına salır.

Ona görə də, prezident Volodimir Zelenski bir tərəfdən Ukraynaya hərbi dəstək verən NATO ölkələrinə təşəkkür edir. Digər tərəfdən isə Ukraynaya hücum silahlarının göndərilməsində yaşanan gecikməyə görə Qərb ölkələrini üstüörtülü şəkildə qınayır: "Rusiya məğlub edilməlidir. Ona görə də, azadlıq müdafiəçilərimizin yeni silahlara ehtiyacı var”.

Ukrayna prezidenti V.Zelenski Almaniyanın Ramşteyn hərbi hava bazasında keçirilən Ukraynanın Müdafiəsi üzrə Təmas Qrupunun iştirakçılarına müraciətində “Rusiya xalqları məhv etmək gücünə sahib olmaq istəyir və bu barədə Moskvada açıq şəkildə danışırlar. Rusiya nifrətin dünyadan güclü ola biləcəyinə hamını inandırmağa çalışır”, deyib. Ukrayna liderinin fikrincə, vaxt itirmək olmaz: "Rusiya qoşunları yenidən qruplaşdırılır. “Ona görə daha cəld davranmaq lazımdır”.

Maraqlıdır ki, prezident V.Zelenski ABŞ və Qərbdən artıq müasir F-16 döyüş təyyarələri, uzaqmənzilli raketlər və tanklar tələb edir. Onun sözlərinə görə, indiyə qədər göndərilən silahlar Ukraynanı Rusiya işğalından xilas edib. Ancaq Ukraynanın tam hərbi qələbəsi üçün yalnız müdafiə deyil, strateji hücum silahları da lazımdır. Və bunun gecikdirilməsi vəziyyəti Rusiyanın xeyrinə də dəyişə bilər.

Təbii ki, Ramştayn zirvəsində Ukraynaya yeni hərbi yardım paketi təsdiqləndi. Ukrayna bu dəfə 150 zirehli texnika, döyüş helikopterləri, "Patriot" raket sistemləri və s. yeni müasir silahlarla təmin ediləcək. Ancaq bu silahların Ukraynaya müdafiə taktikandan tam hücum strategiyasına keçmək imkanı verib-verməyəcəyi hələlik müəmmalı olaraq, qalır.

8e0da806f444894cbc6834efa44019f9.jpg (156 KB)Ancaq Kremlə yaxın siyasi dairələr Ramştayn zirvəsində Rusiyaya qarşı yeni savaş planının hazırlandığını iddia edirlər. Onların fikrincə, NATO-nun yeni mərhələ planı daha çox hücum və savaşın Rusiyanın daxilinə keçirtmək strategiyasına əsaslanır. Və Rusiyanın gələcək taleyi məhz bu hücum strategiyasına cavab verməyə nə qədər hazır olmasına bağlıdır.

Məsələ ondadır ki, Rusiya siyasi dairələri Ukrayna ordusuna daha effektiv hücum silahları göndəriləcəyindən narahatdırlar. Üstəlik, NATO dövlətlərinin Ukrayna ordusunun hərbi forması altında savaş meydanına öz qoşunlarını göndərə biləcəyindən də ehtiyat edirlər. Və NATO planında yaz aylarında Ukrayna ordusunun genişmiqyaslı hücum əməliyyatlarına hazırlanmasının xüsusi yer tutduğu bildirilir.

Rusiya siyasi dairələri NATO-nun yeni planı üzrə Azov dənizi, Krım, Donetsk və Luqansk istiqamətlərindən eyni vaxtda hücum olunacağını ehtimal edirlər. Əgər, bu hücum uğurlu olarsa, Rusiya ordusu darmadağın edilmiş olacaq, nəticədə Kremlə yarımkapitulyasiya şərtləri diktə ediləcək. Ardınca hərbi əməliyyatlar Rusiyanın daxilinə keçiriləcək və cəmiyyətdə, əhali arasında Kremlə qarşı narazılıq yaradılacaq. Bütün bunların sayəsində Rusiyada hakimiyyət dəyişikliyinə cəhd göstəriləcək, hərbi-siyasi elita həbs ediləcək. Və Rusiyanın indiki hərbi-siyasi modeldə mövcudluna son verməyə calışılacaq.

Göründüyü kimi, Rusiya siyasi dairələri olduqca narahatdır. Hətta NATO-nun Rusiyaya qarşı mümkün planlarını ehtimal etməyə də çalışırlar. Hər halda, bu, Kremldə təhlükənin kifayət qədər ciddi olduğunu anladıqlarını biruzə verir. Üstəlik, son günlər paytaxt Moskvada önəmli hərbi-strateji obyektlərin HHM sistemləri ilə müdafiə altına alınması da Rusiyanın ağır duruma düşdüyünü təsdiqləyir. Halbuki, Rusiyanın yaxınlaşan böyük hərbi-siyasi fəlakətə müqavimət potensialı da kifayət qədər ciddi şübhələr doğurur.