Putinin yerinə prezident olacaq şəxs... - DETALLAR

 “Kreml artıq dövlət başçısının dəyişdirilməsinin zəruriliyini başa düşdüyündən bu məsələni ciddi müzakirə etməkdədir. Ona görə də Putin ətrafı ilə hakimiyyətdən gedişi və varisin müəyyən edilməsi barədə fikir mübadiləsi aparıb”.

“Ölkə.Az” xəbər verir ki, bir çox nüfuzlu xarici media orqanları bu barədə məlumat yayıb.

Müzakirələrin əsas predmeti yeni prezident seçilən zaman davamlılığın qorunması, ölkəni daha ciddi kataklizmlərdən qorunması ssenariləridir.

Analitiklərin sözlərinə görə, Putin ilin sonunda 2023-cü il martın 26-da keçiriləcək növbədənkənar seçkiləri elan etmək niyyətindədir. Baxmayaraq ki, Rusiyada növbəti prezident seçkiləri 2024-cü ilin martın 17-nə nəzərdə tutulub.

Növbədənkənar prezident seçkilərinin keçirilməsi elan olunsa da, Putin öz namizədliyini irəli sürmək niyyətində deyil. Əksinə, öz namizədini irəli sürməyi planlaşdırır.

Bəzi məlumatlara görə, onlar hazırda Rusiya Federasiyasının Kənd Təsərrüfatı Nazirinin kürsüsünü tutan Nikolay Patruşevin oğlu Dmitriy Patruşevin namizədliyini irəli sürməyi planlaşdırır.

Onu da qeyd edək ki, dünya mediasında Putinin yerinə real namizəd kimi Rusiya təhlükəsizlik şurasının katibi Nikolay Patruşevin adı hallanır. Ola bilsin ki, bu, cəmiyyəti hazırlamaq üçün ictimaiyyətə sızdırılan informasiyadır. 

Nikolay Patruşev (11 iyul 1951-ci il) Vladimir Putindən (7 oktyabr 1952-ci il) yaşca böyük olduğundan optimal variant kimi daha gənc bir namizədin üzərində dayanılması ehtimali daha böyükdür. Dmitriy Patruşev 1977-ci ildə anadan olub və  hakim klan üçün ən real namizəd ola bilər.

Dmitriy Patruşevin Putinin varisi olmasını zəruri edən ən ən vacib arqument Peterburq klanının nümayəndəsi olmasıdır.

Patruşevlər də Sankt-Peterburqlu olmaqla yanaşı, klanın ən nüfuzlu şəxslərindən biri hesab olunur. Nəzərə alsaq  ki, Rusiyanın siyasi elitasını və hakim komandanın əsas nüvəsini məhz Sankt-Peterburqlu klanının üzvləri təmsil edir, o zaman hər şey aydın olar. O baxımdan Dmitriy Patruşevin namizədliyini real hesab etmək olar.

Digər xüsusi bir məqam isə Dmitriy Patruşevin gənc və bu yaşda Rusiya siyasi elitasında xüsusi yer tutması, Putinin varisi olmasını şərtləndirən əsas amillərdəndir. Çünki Sankt-Peterburq klanının üzvlərinin övladları arasında belə karyeraya malik digər namizədin olmamasıdır. Olanların da reputasiyası müsbət deyil. 

Dmitriy isə klan üzvlərinin övladları arasında daha perspektivli və karyeraya malik şəxsdir. Digər tərəfdən də o nazir postunu daşıyır və yetərincə dövlət idarəetmə təcrübəsi əldə edib. 

Belə ki,1999-cu ildə Dövlət İdarəetmə Univetrsitetini bitirən Dmitriy Patruşev 2003-cü ildə iqtisad elmləri namizədi adı alıb. O, daha sonra 2002-2004-cü illərdə RF XİN-nin Diplomatik Akademiyasını, 2006-ci ildə isə FTX Akademiyasını bitirib. 1999-2002-ci illərdə Nəqliyyat Nazirliyində, 2004-cü ildə Putinə  birbaşa bağlılığı ilə seçilən VTB bankda işləməyə başlayıb və 2007-ci ildən VTB Bankın baş vitse-prezidenti vəzifəsinə seçilib. 2010-2018-ci illərdə “Rosselxozbank”ASC İdarə Heyətinin sədri, Müşahidə Şurasının üzvü, 2018-ci ildən isə Müşahidə Şurasının sədridir. 2016-2021-ci illərdə “Qazprom” PJSC İdarə Heyətinin üzvü olub.
8 may 2018-ci ildən isə Putinin sərəncamı ilə RF Kənd təsərrüfatı naziri təyin edilib və hazırda bu vəzifəni daşıyır. 

Nikolay Patruşev eyni zamanda orta məktbədə hakim “Vahid Rusiya” partiyasının Ali Şurasının sədri, Putinin ən yaxın ətraflarından və böyük nüfuza malik hesab olunan Boris Qrızlovla eyni sinifdə oxuyub.

Daha xüsusi bir məqam isə ondan ibarətdir ki, Patruşevlə Putinin də çox yaxın münasibəti olub.

Belə ki, 1998-ci ildə Putin RF Prezident Administrasiyası Baş Nəzarət İdarəsinin rəhbəri vəzifəsindən Rusiya Prezident Administrasiyasının rəhbərinin müavini təyin edilərkən, Patruşev Putini əvəz edib. O, hələ 2006-cı ildə siyasi şərhçilər tərəfindən Putinin mümkün varislərindən biri kimi göstərilib.

Siyasi şərhçilər bu gün Nikolay Patruşevi hazırda Putini əvəz edəcək real namizəd hesab edirlər. Lakin Nikolay Patruşevin yaş həddi və səhhətində ciddi problemlərin olması, heç də digər hakim komanda tərəfindən birmənalı qarşılanmadığından onun namizədliyi mümkün görünmür. Amma oğul Patruşev mövcud hakim siyasi komanda tərəfindən məqbul edilən və maraqlarını təmin edəcək ən real namizəddir. 

Mürtəza
Ölkə.Az